الثلاثاء، ديسمبر 27، 2005

المعتصبين - بديع خيري


ما قلتلكش ان الكتره لابد يوم تغلب الشجاعة
واديك لقيت كلام الأُمَرَه طلع تمام ولا فيهش لواعة

غيرش اللي كان هالك أبداننا ومطلع النجيل على عيننا
إن محمد يكره حنا ، وايش دخَّل دول يانا بَس في ديننا
دَخَل بيناتنا اللي موَقَّعنا في بعضنا وراح لك متصدر
فقسنا لعبته واتجمعنا لَيضيع شرفنا الله لا يقدر

عاديك على اللي اديتله الدنيا، وإشي بَقالُه شركة ومتاعة
تشوفنا إحنا تقول حنفية وتشوفه هوَّ تقول بلاعة

عايشين في وادي النيل نشرب بالعدّادات على مللي وسنتي
من جاز لمَلح ومن سُكر لِتُرمايات لخواجة كريانتي

ربنا ما يوَرّيكش لوصتنا، الجيب نضيف أمّا البيت أنضف
والهدمة دي اللي على جتتنا محجوز عليها، دي عيشة تقرَّف
مالقيناش غير إضرابنا ولا إنناش نبقى في إهانة
ضربوا لنا الاعوَر على عينه قال ماهي تلفانة تلفانة

لا والأدهى من دي قولِتهم علينا اننا عصبجية
ياهل ترى إيه تعا نسألهم تتاكل ازاي يا اسطى عطية

الحق كله على الأغنيا، إحم يا فرحتنا بكترتهم
ملهيين في روزة وماريا والسف نازل على أمتهم

إمتى بقى نشوف قرش المصري يفضل في بلده ولا يطلعشي
إنتم بمالكم واحنا بروحنا، دي إيد لوحدها ما تسقفشي


غنوة المعتصبين – أوبريت رن – كلمات بديع خيري، ألحان سيد درويش – كتبت قبل عام 1919
المصدر: كتاب بديع خيري – الأزجال البديعية والألحان الريحانية – دراسة فنية سياسية اجتماعية بقلم حسن درويش -صادر عن المجلس الأعلى للثقافة


إضغط هنا للاستماع إلى الأغنية

الأربعاء، ديسمبر 07، 2005

يا مصر قومي - نجيب شهاب الدين


يا مصر قومي وشدي الحيل
كل اللي تتمنيه عندي
لا القهر يطويني ولا الليل
آمان آمان بيرم أفندي

رافعين جباه حُره شريفة
باسطين أيادي تأدي الفرض
ناقصين مؤذن وخليفة
ونور ما بين السما والأرض

يا مصر عودي زي زمان
ندهه من الجامعة وحلوان
يا مصر عودي زي زمان
تعصي العدوين وتعاندي
آمان آمان بيرم أفندي

يا مصر قومي وشدي الحيل
كل اللي تتمنيه عندي
لا القهر يطويني ولا الليل
آمان آمان بيرم أفندي

الدم يجري في ماء النيل
والنيل بيفتح على سجني
والسجن يطرح غلة وتيل
نجوع ونتعرى ونبني

يا مصر لسه عددنا كتير
لا تجزعي من بأس الغير
يا مصر ملو قلوبنا الخير
وحلمنا ورد مندي
آمان آمان بيرم أفندي


يا مصر قومي وشدي الحيل
كل اللي تتمنيه عندي
لا القهر يطويني ولا الليل
آمان آمان بيرم أفندي

يسعد صباحك يا جنينة
يسعد صباح اللي رواكي
يا خضره من زرع إيدينا
شربت من بحر هواكي

شربت من كاس محبوبي
وعشقت نيل أسمر نوبي
وغسلت فيه بدني وتوبي
وكتبت اسمه على زندي
آمان آمان بيرم أفندي

يا مصر قومي وشدي الحيل
كل اللي تتمنيه عندي
لا القهر يطويني ولا الليل
آمان آمان بيرم أفندي

الخميس، ديسمبر 01، 2005

رضوى - أسامة عفيفي


قصيدة مهداه إلى ابنته
.
رضوى
زهرة الماء التى تنتظر
بين نهيرات العسل ، وماء الجنة
عودة المنتظر
.
عناق عشتار وحاتحور
عند بوابة صلاح الدين
دموع زينب بنت على التى احتضنت
راس الحسين الذبيح
فظل قميصها
المخضب بدماء ابن ابيها
يتضوع مسكا حتى
احتواها تراب المحروسة
.
رجفة الصبح اذ تتلامس الندى الشتائى
اكفنا الخارجة توا من تحت الفراش الدافىء
.
نبضة الروح النابضة فى حنايا الصدر
الذى ضاق بنداءات سائقى الميكروباص
ومدائح مثقفى الحظيرة لابداعات الوزير الفنان
وميكروفونات المرشحين لمجلس الموافقين، والمنافقين
وبقايا الثوريين من بائعى المانشتات الساخنة
عن دم الاشقاء فى بغداد وتهديدات المارينز لدمشق
.
نسمة العصارى البحرية التى انتظرتها كلما لفحنى
قيظ صحرائى الممتدة الى ما لا نهاية بعد رحيل
الاصحاب وتمكن الاقدام الغليظة من القلب
.
نخلتى التى زرعت بذرتها بين النهرين
لتظلل الوادى
وياكل من ثمارها
فلاحو الدلتا والصعيد
رطبا جنيا
4-11-2005