الثلاثاء، ديسمبر 27، 2005

المعتصبين - بديع خيري


ما قلتلكش ان الكتره لابد يوم تغلب الشجاعة
واديك لقيت كلام الأُمَرَه طلع تمام ولا فيهش لواعة

غيرش اللي كان هالك أبداننا ومطلع النجيل على عيننا
إن محمد يكره حنا ، وايش دخَّل دول يانا بَس في ديننا
دَخَل بيناتنا اللي موَقَّعنا في بعضنا وراح لك متصدر
فقسنا لعبته واتجمعنا لَيضيع شرفنا الله لا يقدر

عاديك على اللي اديتله الدنيا، وإشي بَقالُه شركة ومتاعة
تشوفنا إحنا تقول حنفية وتشوفه هوَّ تقول بلاعة

عايشين في وادي النيل نشرب بالعدّادات على مللي وسنتي
من جاز لمَلح ومن سُكر لِتُرمايات لخواجة كريانتي

ربنا ما يوَرّيكش لوصتنا، الجيب نضيف أمّا البيت أنضف
والهدمة دي اللي على جتتنا محجوز عليها، دي عيشة تقرَّف
مالقيناش غير إضرابنا ولا إنناش نبقى في إهانة
ضربوا لنا الاعوَر على عينه قال ماهي تلفانة تلفانة

لا والأدهى من دي قولِتهم علينا اننا عصبجية
ياهل ترى إيه تعا نسألهم تتاكل ازاي يا اسطى عطية

الحق كله على الأغنيا، إحم يا فرحتنا بكترتهم
ملهيين في روزة وماريا والسف نازل على أمتهم

إمتى بقى نشوف قرش المصري يفضل في بلده ولا يطلعشي
إنتم بمالكم واحنا بروحنا، دي إيد لوحدها ما تسقفشي


غنوة المعتصبين – أوبريت رن – كلمات بديع خيري، ألحان سيد درويش – كتبت قبل عام 1919
المصدر: كتاب بديع خيري – الأزجال البديعية والألحان الريحانية – دراسة فنية سياسية اجتماعية بقلم حسن درويش -صادر عن المجلس الأعلى للثقافة


إضغط هنا للاستماع إلى الأغنية

7 تعليق/تعليقات:

Blogger عبدالله النديم قال/قالت...

تفتكرى فيه حد صور الاستغلال تصوير اكثر عبقرية من تشوفنا احنا تقول حنفية تشوفه هو تقول بلاعة
الله يرحمك يا بديع رضع من نفس الصدر اللى رضع النديم وسيد بيرم وامام ونجم

6:39 م  
Blogger سامية قال/قالت...

طبعا عنك حق.. ثنائي بديع خيري وسيد درويش -غير قيمتهم الفنية- هم أحسن من عبر عن مشاكل مجتمعنا في ذلك الوقت وحتى الآن

ولو إني ما باحبش أحط نجم وإمام وسيد درويش وبيرم التونسي والنديم في نفس السلة لكن أكيد كلهم رضعوا من نفس الصدر كمثل المصريين كلهم

3:54 م  
Blogger أبوشنب قال/قالت...

العالم دي عباقرة فعلاً
أكتر حاجة مش قادر أتخيلها
إنهم وصفو حاجات من عشرات السنين
ولسة بنلف وندور في فلكها

أنا بجد في الاول افتكرتها حاجة جديدة مكتوبة

وكله كوم وماريا وروز كوم تاني

هو على ايامهم كان فيه فيديو كليب

عجبي

1:01 ص  
Blogger سامية قال/قالت...

ماهو كل زمن وله كليباته بقى

هم عباقرة فعلا .. المشكلة فينا احنا لما يكون الكلام ده عمال بيتقال السنين دي كلها واحنا لسه بنآوح

9:53 ص  
Blogger سمير الأمير قال/قالت...

ساميه انتى اختياراتك _ رائعة واحساسك
جميل
سمير الأمير/ شاعر

2:41 م  
Blogger سمير الأمير قال/قالت...

http://www.samirelamir.blogspot.com/
زورى ياسامية الصفحة دى- ياريت تعجبك

2:47 م  
Blogger gr__motaz قال/قالت...

الف رحمة ونور يا استاذ صلاح يا جاهين
والف شكر انا لسه داخل لأول مرة عندك كان لازم أقولك أنى من أكتر المعجبين بعبقرى كل العصور صلاح جاهين اللى شكل كل الوجدان لكل واحد بيقهم

7:40 م  

إرسال تعليق

<< الصفحة الرئيسية