الثلاثاء، سبتمبر 20، 2005

حالة شاذة! - فؤاد حداد


  • إسمك إيه؟

  • إسمي بدل فاقد

  • صنعتك ايه؟

  • صنعتي ناقد!

  • يعني حاقد؟

  • لأ مش حاقد

  • انت بتدافع؟

  • لأ باهجم!

  • انت بتؤلف؟

  • وباترجم!

  • أنت سادي؟

  • ساعات أنا بارجم الهواه واشعر باللذة!

  • حالة شاذة! حالة شاذة! صورة مهتزة مهتزة!
.
  • قلت إيه في الأراجوز؟

  • تركي! تركي والفلسفة يوناني!

  • قلت إيه في مكسيم جوركي؟

  • برضه روسي ومش يوناني
    مصري، إسطنبولي، نيويوركي..
    كل فن ماهوش يوناني يبقى مش كاتبينه أساتذة!

  • حالة شاذة! حالة شاذة! صورة مهتزة مهتزة
    .
  • قلت إيه في أدبنا؟

  • سطحي!

  • زيّ شطحي ونطحي وبطحي؟

  • زيّهم!

  • إشرح!

  • آدي شرحي: باكره اللي يرقص وسطه
    واللي مابيعرفش أرسطو.
    مش مفيد الناس ينبسطوا!المفيد الناس تتأذّى!

  • حالة شاذة! حالة شاذة! صورة مهتزة مهتزة!
    .
  • قلت إيه في الكورة؟

  • بلاوي!

  • مش غاويها؟؟

  • لأ مش غاوي!

  • تعمل ايه يا طبيب يا مداوي لو تطول الجون؟

  • أنا اهدّه! كل شيء فيه شيء من ضده!
    كل أهلاوي زملكاوي!إلا ناقد زيّي مُنزّه!

  • حالة شاذة! حالة شاذة! صورة مهتزة مهتزة!

8 تعليق/تعليقات:

Blogger hesterua قال/قالت...

الله
انا بقالى شهور نفسى اجيب حاجة مناسبة لحالته مش عارف

بس هو سيكوباتى
عاشق للظهور
مؤمن بحكمة خالف تعرف

7:13 م  
Blogger R قال/قالت...

ظريفة..
قصيدة في نقد الناقد :)
ـ

10:47 م  
Blogger mindonna قال/قالت...

جميل الموسيقي اللي في القصيدة

11:20 ص  
Blogger أحمد قال/قالت...

طبعا قصيدة رائعه جدا

باشكرك على اهدائها لى أنا مخصوص

:-)

9:15 ص  
Blogger ayman badr قال/قالت...

جميلة القصيدة للشاعر الفنان فؤاد حداد بس القصيدة مش كاملة وإن شاء الله سأضع مأقدر عليه من أعمال الشاعر فؤاد حداد على مدونتى "عرضحالجى" حتى يستمتع بها كل من يريد تذوق الشعر العامى www.3ardhalgy.blogspot.com

11:31 م  
Blogger ayman badr قال/قالت...

جميلة القصيدة للشاعر الفنان فؤاد حداد بس القصيدة مش كاملة وإن شاء الله سأضع مأقدر عليه من أعمال الشاعر فؤاد حداد على مدونتى "عرضحالجى" حتى يستمتع بها كل من يريد تذوق الشعر العامى www.3ardhalgy.blogspot.com

11:31 م  
Blogger سامية قال/قالت...

لأ هي القصيدة كاملة وموجودة كما هي هنا في ديوان الأراجوز

على العموم أهلا وسهلا بيك

11:02 ص  
Blogger dina قال/قالت...

الله الله...............الناس دى بتجيب الكلام الجامد دا منيين...تجننننننننننننننن

8:55 م  

إرسال تعليق

<< الصفحة الرئيسية