الأربعاء، أبريل 13، 2005

إلى اللقاء - صلاح جاهين


بابلونيرودا
إلى اللقاء
قتلوك حقيقي
والا افتراء؟

الشعر طول عمره سكة واحدة
وغنوة واحدة بلا انتهاء
تهنينة واحدة من غير ولادة
مرثية واحده من غير بكاء

لحظة سعادة تمنها غالي
بوشكين يقول لك وأبوالعلاء
الشعر طول عمره تهمة غامضة
وكل شاعر وله جزاء

ولو يغني للشعب زيك
يبقى مصيبة رأس البلاء
يلحق بلوركا ويقابله لوركا
هناك في مستنقع الدماء

يمسح جراحه ويقول له قل لي
فيه لسه ف الدنيا أدنياء؟
فيه لسه ناس ماسكه بندقية
ومصوباها للأبرياء؟
للحب؟ للحلم؟ للحقيقة؟ للنماء؟

دماء كمال ناصر إللي لسه
طراي وزي العسل صفاء
تنطق تقول أيوه لسه برضه
الضلمة قادرة على الضياء
وقادرة تقتل بابلونيرودا
وألف غيره م الشعراء

وأقول أنا
صحيح.. ولكن الشعرمتعة
وأي متعة زي العطاء
بابلونيرودا
إلى اللقاء
** من ديوان أنغم سبتمبرية **

3 تعليق/تعليقات:

Blogger wa7ed mn masr قال/قالت...

سمسمة:صحيح لسه "برضه
الضلمة قادرة على الضياء" صحيح "نوح راح لحاله و الطوفان استمر..." صحيح خلاص مافيش لوركا و لا نيرودا و لا جاهين لكن أملي ييجي في يوم "قمر كأنه فرخ الحمام.." يمكن يقدر في يوم يشق الغمام ،يمكن يرجعنا تاني نرسم وردة وبيت و قلب و علم

1:00 م  
Blogger Walid Elreedy قال/قالت...

"الشعر طول عمره تهمة غامضة
وكل شاعر وله جزاء
"
كلمات معبرة تصف الشاعر الحقيقي الذي لا يلهث وراء السلطة..تحياتي

2:56 ص  
Blogger arabmag قال/قالت...

احلى ما فى صلاح جاهين انه كان مع مجتمعه بيحس بيه وبيعكس دا فى اشعاره

2:32 م  

إرسال تعليق

<< الصفحة الرئيسية