ياأخضر يا ريحة مصر - فؤاد حداد
جرحي مالهش الا جرحك
غيطي مالهش الا قمحك
أنا اللي أبكي وماليش
إلا دموعي تسامحك
أنده عليك السنين ما بطلتش الحنين
وانده عليك القمر يعطف على السهرانين
وانده عليك اللي رايح وانده الجايين
وانده عليك من بلدنا لآخر الفدادين
وانده عليك كل نظره تلتفت على فوق
وانده عليك كل عاشق
وانده عليك الشواطئ
اللي تعرف شوق الميه للعطشانين
أنده عليك يا أخضر وقلبي حزين
ساعة ما يرجع كل طير للعش
لون السما والأرض لون العشق
وانا طول حياتي وعشت أنده عليك
أنده عليك يا حبيبي كل إسم جميل
وكل خطوة تعدي وكل غصن يميل
مكتوب لكل الحبايب وعد يتقابلوا
في يوم حنين أحن من اللي كان قبله
أنده عليك المواسم وانده الأعياد
وهدوم جديدة ومطارح نور وضحك ولاد
وادور بعيني ألاقي في كل ناحيه ميعاد
أنده عليك يا أخضر وكلي وداد
ساعة ما يرجع كل طير للعش
لون السما والأرض لون العشق
وانا طول حياتي وعشت أنده عليك
10 تعليق/تعليقات:
allah :)) we da she3r meen ya tara? nawarina ya set ;)
ma3lesh neseet 2a7ot el esm :) Salla7taha aho
ده من ديوان كلمة مصر، 1975
كان فيه عرض ف الهناجر اسمه الفن ساس، غنوا حاجات منه، ألحان وجيه عزيز، حضرتوه؟
أيوة حضرناه ... المؤسسة إللي أنا باشتغل فيها(المورد الثقافي) هي اللي كانت منظمة العرض
بدون اي مبالغة او نوع من الادعاء,باحس ان كل المدونين المصرين او لنقول معظمهم بينتموا لنفس العالم
اذن هل كلامنا كلام من النخبة للنخبة كما يقال؟؟
El mawdoo3 la 2a3taqed enno loh 3elaqa bel modaweneen. Masr 3omooman soghayara wel nashat el thaqafy feeha ma7dood we nafs el woshoosh betkoon heyya heyya elli betla2eehom fel amaken elli feeha ansheta thaqafeya... we ba3dein maftekersh en di 7aga fe Masr bass aw fel 3alam el 3arabi bass...
سامية، لو سمحتي، ممكن تبعتيلي صورتين تلاتة من عرض الفن ساس؟ كتبت عنه حاجة هتتنشر ف موقع وناقصها الصور. دوسي على توقيعي هتلاقي ف بياناتي عنواني بريدي.
Bass 3ala shart teb2a teb3atly el maqala!! :D
ابتزاز يعني؟ ماشي، بس هي فين الصور؟ هابتعهالك والله حتى قبل ما تنزل ع الموقع، لأن الموقع هيطلع على أول أبريل. هاتي بقى!
هي مش متغنية؟؟
إرسال تعليق
<< الصفحة الرئيسية